रतन टाटांनी दूरदृष्टी दाखवली, त्याच कंपनीला एअरटेलकडून धोबीपछाड.....****

                       

      

                          भारतातील दूरसंचार क्षेत्रातील मोठी कंपनी असलेल्या भारती एअरटेलने टाटा कन्सल्टन्सी सर्व्हिसेस (TCS) ला मागे टाकत मार्केट कॅपिटलायझेशनमध्ये तिसरे स्थान पटकावले आहे. एअरटेल च्या शेअर्समध्ये सोमवारी 1 टक्क्यांची वाढ झाली, ज्यामुळे कंपनीचे मार्केट कॅप 11.45 लाख कोटी रुपये झाले, जे टीसीएसच्या तुलनेत 2220 कोटी रुपयांनी अधिक आहे. रिलायन्स इंडस्ट्रीज (RIL) अजूनही 19.3 लाख कोटी रुपयांच्या मार्केट कॅपसह पहिल्या स्थानावर आहे, तर HDFC बँक 15.3 लाख कोटी रुपयां सह दुसऱ्या स्थानावर आहे. आता भारती एअरटेल कंपनी ही तिसऱ्या क्रमांकावर आली आहे. या वर्षात एअरटेल चे मार्केट कॅपिटल हे तब्बल २ लाख कोटी रुपयांनी वाढले.निफ्टी 50 मध्ये दुसऱ्या स्थानावर झेप

सोमवारी एअरटेलच्या शेअरमध्ये 1 टक्क्यांनी वाढ झाली. निफ्टी 50 मध्ये एअरटेल रिलायन्स इंडस्ट्रीजच्या नंतर दुसऱ्या क्रमांकावर आहे. टीसीएसच्या शेअर्समध्ये घसरण झाली आहे. अमेरिकेतील बाजारातील मंदी आणि आर्टिफिशियल इंटेलिजन्स संबंधित अडचणींमुळे ही घसरण झाली असल्याचे मानले जात आहे. तज्ज्ञांचे म्हणणे आहे की आगामी तिमाहीत आयटी कंपन्यांवर कमाईचा दबाव येऊ शकतो, तर मध्यम आकाराच्या कंपन्या चांगली कामगिरी करू शकतात.

एअरटेलची तेजी कायम राहणार?

तीन वर्षांपूर्वी एअरटेल टॉप 10 मध्येही नव्हती.यापूर्वी एअरटेलने 2009 मध्ये टीसीएसला मागे टाकले होते, पण त्यावेळी टीसीएस तिसऱ्या स्थानावर नव्हती. आता एअरटेलने तिसरे स्थान मिळवले आहे. ब्रोकरेज कंपन्या एअरटेलबाबत सकारात्मक आहेत. जेफरीजसह अनेक ब्रोकरेज कंपन्यांनी एअरटेलमध्ये तेजीचा अंदाज वर्तवला आहे. भारतातील वाढत्या खपासाठी एअरटेल गुंतवणुकीचा चांगला पर्याय असल्याचे त्यांनी म्हटले आहे. त्यांच्या मते, एअरटेलच्या कमाईत आणखी वाढ होईल आणि शेअर्समध्ये तेजी येईल.

एकूण शेअर्स

मार्च 2025 पर्यंत एअरटेलचे एकूण 609.44 कोटी शेअर्स होते, ज्यापैकी 39.23 कोटी आंशिक भरणा केलेले शेअर्स आहेत. आत्तापर्यंत एअरटेलच्या शेअर्समध्ये 20.2 टक्क्यांची वाढ झाली आहे, तर टीसीएसच्या शेअर्समध्ये 22 टक्क्यांची घट झाली आहे.... . नारायण परब ..