नांदेडमध्ये रक्ताचे सडे! तीन दिवसांत ५ खुनांनी जिल्हा हादरला; पोलिसांचा धाक संपला की गुंडांना सत्तेचा वरदहस्त ..?

 

नांदेड प्रतिनिधी. :

                               गेल्या काही दिवसांपासून नांदेड जिल्ह्यातील कायदा आणि सुव्यवस्थेचे अक्षरशः धिंडवडे निघाले आहेत. अवघ्या तीन दिवसांत ५ भीषण खून झाल्याने संपूर्ण जिल्हा दहशतीखाली आहे. एकीकडे राज्याचे गृहमंत्री निवडणुकीच्या राजकारणात व्यस्त असताना, दुसरीकडे नांदेडच्या रस्त्यांवर रक्ताचे सडे पडत आहेत. या वाढत्या गुन्हेगारीमुळे 'नांदेडमध्ये पोलीस दल अस्तित्वात आहे की नाही?' असा संतप्त सवाल आता सामान्य नागरिक विचारू लागले आहेत.

      गुन्हेगारांचे धाडस वाढले :- 

                          नांदेडमध्ये ज्या पद्धतीने दिवसाढवळ्या आणि सार्वजनिक ठिकाणी हत्या होत आहेत, ते पाहता गुन्हेगारांना कायद्याचा किंवा पोलिसांचा कोणताही धाक उरला नसल्याचे स्पष्ट होत आहे. गुन्हेगार निर्धोकपणे रस्त्यावर शस्त्रे परजत फिरत आहेत आणि नागरिकांच्या सुरक्षेचा प्रश्न ऐरणीवर आला आहे. किरकोळ वादातून किंवा पूर्ववैमनस्यातून थेट जीवे मारण्यापर्यंत गुन्हेगारांची मजल गेली आहे.

          राजकारण की जनतेची सुरक्षा ?

                राज्याचे गृहमंत्री सध्या आगामी निवडणुकांच्या नियोजनात आणि राजकीय सभांमध्ये मग्न आहेत. मात्र, त्यांच्याच कार्यकाळात जिल्ह्यांची सुरक्षा वाऱ्यावर सोडली गेली आहे का? असा प्रश्न उपस्थित होत आहे. "निवडणुकीच्या राजकारणातून गृहमंत्र्यांना वेळ मिळत असेल, तर त्यांनी एकदा नांदेडच्या रस्त्यांवर सांडलेले रक्त पहावे," अशी जळजळीत टीका आता विरोधक  अंबादासजी दानवे साहेब आणि जनतेकडून केली जात आहे.

       सत्तेचा वरदहस्त असल्याचा संशय. :- 

                       एवढ्या मोठ्या प्रमाणात गुन्हेगारी वाढत असताना पोलीस प्रशासन हतबल का दिसत आहे? गुन्हेगारांना कोणाचे पाठबळ मिळत आहे? गुंडांना सत्तेचा वरदहस्त लाभला आहे का, ज्यामुळे ते पोलिसांनाही जुमानत नाहीत, असा गंभीर संशय आता व्यक्त केला जात आहे. जर तात्काळ कठोर पावले उचलली गेली नाहीत, तर नांदेडची ओळख 'गुन्हेगारांचे शहर' म्हणून होईल, अशी भीती व्यक्त होत आहे.

                    जिल्ह्यात निर्माण झालेली ही अराजकता थांबवण्यासाठी गृह विभाग आणि स्थानिक पोलीस प्रशासन काय पावले उचलणार, याकडे सर्वांचे लक्ष लागले आहे.